Govnor Rotimi Akeredolu of Ondo State don die afta im battle wit sickness according to reports.
Na early Wednesday morning informate reach say di govnor bin die for wia e dey receive treatment.
Di 67-year-old bin spend on medical leave before e return come Nigeria sake of im health in September 2023.
Plenti rumour bin surround di health of di govnor as im spend about 93 days for Germany wia im go receive treatment.
President Bola Tinubu aide Bayo Onanuga confam di tori for im X account.
Akeredolu, Senior Advocate of Nigeria (SAN), ex-president of di Nigerian Bar Association (NBA), and ex-Attorney General of Ondo State, na second-term govnor before im death.
E go on anoda medical leave for November 2023 wia e suppose get medical treatment wey go improve im health.
Chief Press Secretary Richard Olatunde, Govnor Akeredolu bin say di govnor need to dey well before e resume im official duties and na wetin e wan prioritise for now.
“A formal letter for di medical leave and a notice wey go formally transfer power according to di Nigerian Constitution go dey transmitted to di House of Assembly.
“For di absence of Govnor Akeredolu, di deputy govnor, Lucky Orimisan Aiyedatiwa, go assume di responsibilities of di govnor for acting capacity,” di statement tok.
Na di last activity wey Akeredolu bin perform be dis before tori of im death comot.
For ova two months wey di govnor of Ondo state Rotimi Akeredolu bin return from medical leave wia im go collect treatment, pipo no see am for di state wey e dey govern.
Govnor Akeredolu begin im 21-day medical leave for June 2023 wen im travel go Germany for treatment. E suppose return by July 2023, but di govnor fail to return.
Wen govnor Akeredolu no return as e promise for im letter to di state house assembly, im write to di lawmakers on 15 July again to extend di medical leave.
Govnors and oda politicians don begin pay tribute to di late Akeredolu.
Ogun state Govnor Dapo Abiodun post on X, to express im condolence and tok sorry to di family and pipo of Ondo state on di passing of oGvnor Rotimi Akeredolu.
E say as di nation mourn di loss of dis remarkable leader, Rotimi Akeredolu, memory go forever shine as a beacon of hope and inspiration for future generations.
“Im legacy, grounded in compassion, justice, and progress, go endure, serving as a constant reminder of di transformative power of determined leadership.” Abiodun tok.
Di President, African Development Bank Group Akinwunmi Adesina alsoe express sadness ova di death of Govnor Akeredolu.
“You finish di race, you dey kindhearted. You serve your pipo wit commitment. May God comfort your family and di pipo of Ondo state. E tok for im condolence e post on X.
Wetin we know about di Black Christmas for Plateau where jaguda pipo kill ova 70 pipo