Nnamdi Kanu pull shirt for di federal high court on Tuesday to show say dem no dey give am proper treatment and medication and say “im dey die for DSS custody.”
Di leader of di Indigenous people of Biafra (Ipob) bin show di part of im body wia im get marks afta di court allow am to tok for im bail application judgement wey dem deny.
Kanu say dem dey treat am for heart failure but na ‘nonsense medication’ dem dey give am.
Kanu tok say DSS no allow am get access to a doctor of im choice.
“I dey die for DSS custody and dem dey give me nonsense medication and parching me up.”
“Dem dey treat me for heart failure, but dem dey give me shitty medication. Dem want make I die for custody,” Nnamdi Kanu tok.
Di Ipob leader say make di court transfer am go Kuje prison but Justice Nyako reply say she get di right to keep Kanu for anywia wey she feel say im go dey safe.
Justice Nyako say make kanu remain for DSS custody.
Court deny Nnamdi Kanu bail application
Di Federal High Court led by Justice Binta Nyako deny di bail application of Nnamdi Kanu wen im appear for court on Tuesday.
Kanu lawyer reject di bail denial by di court and di detention of di Ipob leader for di DSS hand. Im say di DSS no allow di lawyer get access to Kanu without di officers monitoring dia discussions.
Kanu bin don dey di custody of di Department of State Services (DSS) since June 2021 wen dem arrest am for Kenya and carry am come back Nigeria.
Kanu dey face treason and terrorism charges, sake of im activities for di Eastern part of di country to become an independent nation wey im name go be Biafra.
For di last court hearing, Kanu lawyer, Aloy Ejimakor, bin apply for bail, arguing say Kanu bin dey enjoy di bail wey court grant am for 2017 before Nigerian soldiers invade im house, wey make am run comot for di kontri.
But di lawyer for di federal goment oppose di bail application as e tell di court say Kanu bin don jump bail, and nothing stop am from doing it again.
Justice Nyako fix March 19, wey be Tuesday, for di hearing of bail application, and March 20 for continuation of trial.
Nyako also order DSS make dem allow Kanu to change im cloth, becos na only one type of cloth e dey wear come court since 2021 wen di mata restart.
Timeline of Nnamdi Kanu trial
- Kanu na leader of Ipob, a group wey dey fight for di independence of Biafra.
- Im bin dey live for London wia im go school for University of Liverpool
- Na for London e set up Radio Biafra wey e dey use, togeda with oda social media platforms, to dey pass messages to im followers
- Nigeria goment bin first arrest am for 2015 for Abuja Airport wen e visit Nigeria. Dem charge am to court and court remand am for Kuje prison
- Two years later, court grant am bail on health grounds, but give am strong strong conditions wey include make e no grant interviews and make e no dey for gathering wey pass 10 pipo.
- However, videos wey appear online show Kanu in di midst of thousands of im supporters wey come out to greet am. E also grant interviews to some local and international media
- For September 2017, soldiers of Operation Python Dance bin allegedly attack Nnamdi Kanu house for Umuahia, Abia State, but e escape and nobody see am again
- As Kanu no appear for court after some time, Justice Binta Nyako revoke im bail and issue arrest warrant on top im head
- One year later, October 2018, video of Kanu as e go pilgrimage for Jerusalem appear online. Dat na di first time e dey appear for public since di 2017 incident
- E later return to London and continue to dey broadcast messages for Radio Biafra and on top social media
- For June 2021, Nigeria goment announce say dem don recapture Kanu and bring am back to Nigeria
- Na later tori come out say na Kenyan security forces bin arrest am wen e visit di kontri and hand am over to Nigeria
- Kanu case for di Federal High Court Abuja start again, but e remain for DSS Custody
- April 2022, di court strike out eight of di 15 count-charges wey goment bring against Kanu
- Kanu lawyers no dey satisfied as dem want make court strike out all di charges. Dem carry di mata to di Court of Appeal, and in October 2022, di court agree wit dem and discharge Kanu
- But in December 2023, di Supreme Court overturn di appeal court judgement and tok say Kanu must to face trial
- Di resumption of trial go soon start.
‘Eventful but predictable’ – How Russia Vladimir Putin claim im fifth term in office