YouTube don terminate di official channel of disgraced Nigerian televangelist TB Joshua megachurch say e violate dia hate speech policies.
Dis dey come weeks after one investigation by di BBC and openDemocracy uncover evidence of widespread sexual abuse and torture by di late preacher.
Emmanuel TV bin play a key role for im rise from a local pastor to global star.
TB Joshua die for 2021, but as for im church, Synagogue Church of All Nations (Scoan), na im wife Evelyn Joshua dey run am now.
Di church neva still comment on di removal, but dem bin don tok say previous allegations of wrongdoing dey “unfounded”.
Emmanuel TV bin get more dan half a million followers on YouTube and hundreds of millions of views.
Dis na di second time in three years wey dia YouTube channel dey suspended, following previous breach of di platform community guidelines.
As part of di investigation wit di BBC, openDemocracy bin analyse Emmanuel TV online presence, come find out say at least 50 “abusive” videos dey on YouTube.
Dia team report di videos to YouTube and di account come dey suspended on 29 January.
For one comment to di BBC, di Google-owned video-sharing platform say Emmanuel TV dey “terminated for violating… hate speech policies”.
TB Joshua bin get fame for im “healing” ministries and dem film hundreds of services wey claim to show how e dey cure di physically disabled and chronically ill – wey many former church members don subsequently debunk say no be true.
Di content wey openDemocracy report bin include Emmanuel TV footage of pipo with mental health issues wey dem keep in chains, cases of medical misinformation and examples of smear campaigns against women wey speak out about TB Joshua sexual abuse.
Emmanuel TV satellite channel also dey dropped on 17 January by MultiChoice, a South African company wey dey run popular satellite services DStv and GOTv.
For many years, di channel bin be one of di most successful Christian networks for di world, and e dey broadcast to millions all over di world.
Following di publication of di BBC investigation into TB Joshua, a number of contributors dey trolled by church and Emmanuel TV affiliated accounts online. These accounts also dey reported to YouTube by openDemocracy, but dem never remove dem.
YouTube and oda social media platforms don come under intense scrutiny in recent years over dia online safety policies.
How shutdown by Bureau de Change go take affect naira to dollar exchange rate
