Di Edo State govnorship election na one of di off cycle elections wey go shele for 2024 and candidates don emerge for two of di leading political parties for di state, di All Progressives Congress and di Labour Party.
Govnor Godwin Obaseki tenure go come to an end for November afta eight years of piloting di affairs of di state.
Monday Okpebholo wey be di senator representing Edo central emerge as di candidate of di APC, while di former national chairman of di Nigerian Bar Association (NBA), Olumide Akpata win di LP govnorship primary election for di state.
Meanwhile, na two candidates emerge for di Peoples Democratic Party (PDP) and dis one mean say e neva dey clear who dem go put forward as di pesin wey go represent dem for di election.
Deputy Govnor Philip Shaibu and ogbonge lawyer Asue Ighodalo na di two candidates wey emerge for di PDP govnorship primaries.
Di govnorship election for di state go shele on 21 September 2024.
Monday Okpebholo – APC
Monday Okpebholo beat 11 oda aspirants to emerge candidate of di APC for di November 21 election.
Govnor Bassey Otu of Cross River state and chairman of di APC supplementary primary election declare Okpebholo winner of di election on Friday, for Benin.
Otu tok say di candidate poll 12,433 votes to defeat 11 other aspirants for di primary election.
E tok say di breakdown na 31,863 accredited voters, total votes cast na 31,863, valid votes na 31,863 and na zero invalid vote dey for di primary election.
Olumide Akpata – LP
Olumide Akpata bin score 316 votes to win di LP govnorship primary wey shele for Benin, di Edo State capital, on Friday 23 February.
Na di deputy govnor of Abia State Ikechukwu Emeta declare Akpata as di winner of di election.
“I hereby declare as follows: Mr Olumide Osaigbovo Akpata, having scored di highest number of votes and certified di provisions of di constitution of di party, don dey declared di winner and di gubernatorial candidate of di Labour Party for di Edo State govnorship election 2024,” Emeta tok.
Asue Ighodalo or Philip Shaibu? – PDP
Di govnorship candidate of di PDP for Edo State still neva clear sake of say na two candidates emerge.
Deputy Govnor Philip Shaibu and ogbonge lawyer Asue Ighodalo bin emerge as candidates for two different primaries.
Shaibu bin emerge candidate of di party for one primary. But Ighodalo emerge di candidate of di party for anoda primary where im defeat oda aspirants wit 577 votes including Shaibu wey bin score one vote.
Na Govnor Dauda Lawal of Zamfara State wey be di chief returning officer of di Edo PDP govnorship primaries declare Ighodalo as winner.
“Di Committee having carefully sorted out and counted di votes find say Ighodalo score 577 votes, Philip Shaibu score 1 vote, while odas get zero,” e tok.
Sorrow, tears and pain as Akeredolu make im final journey home
