Nigeria news media dey report say Kenya Police Service don arrest di executive of di Trading Cryptocurrency firm Binance, wey escape from custody for Nigeria for March.
Di report say Nigerian goment dey work wit Kenyan authorities to deport Nadeem Anjarwalla come di kontri.
Although BBC neva fit confam dis report.
Oga Anjarwalla bin run comot Nigeria afta e escape from lawful custody for March.
National Security Adviser, Nuhu Ribadu bin tok for statement say Anjarwalla use im Kenyan passport to escape from Nigeria.
Di kontri now dey “work wit Interpol to get international arrest warrant on di suspect”, di Office of the National Security Adviser (ONSA) tok for one statement.
Nigeria goment bin arrest Anjarwalla wey hold both British and Kenyan passports for February alongside im colleague, Tigran Gambaryan as part of one tax evasion gbege against di cryptocurrency exchanges.
Dia detention dey come as Nigerian authorities dey torchlight alleged wrongdoing by Binance.
EFCC bin file money laundering charge against Binance and dem name Gambaryan and Anjarwalla among di respondents.
Oga Gambaryan still dey for custody.
Di Federal Inland Revenue Service accuse di cryptocurrency platform of non-payment of value added tax, company income tax, failure to file tax returns and say dem get hand for customers to evade taxes through dia platform.
How Binance executive take japa
Tori be say Oga Najeem wey be 38 years old japa from im guest house last Friday afta guards wey dey monitor am bin escort am to di mosque for prayers.
Authorities believe say Najeem wey be British and Kenyan citizen bin fly out of Abuja wit one Middle East airliner.
E neva dey clear how Anjarwalla bin manage to get on di international flight despite say dem seize im British passport, wey be wetin im bin take enta Nigeria.
Security operatives don begin work on how dem go fit sabi Anjarwalla destination so dem go bring am back to custody.
Anjarwalla na Binance Africa regional manager, and Tigran Gambaryan na US citizen wey dey oversee financial crime compliance for crypto exchange platform.
Dem detain di two Binance executives wen dem land for Nigeria on 26 February 2024.
Meanwhile, ONSA don beg di Nigerian public and di international community to provide whatever information dem get wey fit assist law enforcement agencies to catch di suspect.
Who be Nadeem Anjarwalla
Nadeem Anjarwalla na British lawyer and Kenya-based manager for Binance Africa.
Before e join Binance, Nadeem bin serve as Partner for Global Founders Capital. For dis global venture capital fund, e make and manage di fund investments across Africa, primarily for early-stage technology-enabled businesses.
E bin also serve as General Manager for Uber Eats.
According to Standford University wey e get im Masters Degree, Nadeem originally come from Mobasa, Kenya and join di 2013 cohort.
Di primary focus of im study surround di relationship between government policy and business development for Sub Saharan Africa and how business models don adapt to growing government intervention for di market economy.
Before e enrol for Stanford, Nadeem bin practice law for one law firm for Nairobi. E dey exposed to regulatory and commercial framework across kontris for East Africa particularly for di oil and gas, energy and real estate sectors.
Nadeem get degree in Philosophy, Politics and Economics from di University of Oxford and Law degree from BPP Law School and MA from Stanford University
E be passionate skier wey dey excited about di proximity of Tahoe.
Charges wey Nigerian gomment sama Binance
Di federal goment tok say dem dey committed to make sure say compliance wit tax regulations dey and dem go tackle any financial wrong wey dey shele within di cryptocurrency sector.
Di goment bin sama legal action against Binance sake of suspected mago-mago activity for dia wey dem say dey cause gbege for Nigeria economy.
Federal Inland Revenue Service (FIRS) bin announce on Monday say dem don formally lodge charges against Binance for di Federal High Court, Abuja.
For suit number FHC/ABJ/CR/115/2024, di lawsuit implicate Binance wit four-count tax evasion accuse.
Two senior executives of Binance Tigran Gambaryan and Nadeem Anjarwalla be second and third defendants for di suit.
Di charges against Binance include allegations of non-payment of Value-Added Tax (VAT), Company Income Tax, failure to file tax returns, and say dem dey aid customers to evade taxes through di platform.
Accuse say Binance no register wit FIRS for tax purposes wey go against tax regulations wey dey ground for di kontri.
Anoda na Binance failure to collect and remit different categories of taxes to di federation, as Section 40 of di FIRS Establishment Act 2007 as amended tok.
Di revenue agency say di section clearly address non-deduction and non-remittance of taxes, prescribe penalties and potential imprisonment for pesin wey go against am.
Binance allegedly violate tax laws, like failure to issue invoices for VAT purposes, wey make am difficult for subscribers to fit sabi and pay taxes.
“Any company wey dey conduct business wey pass N25 million annually dey seen, by di Finance Act to dey present for Nigeria,” FIRS tok.
“According to dis rule, Binance fall for dat category. So, dem need to pay taxes like Company Income Tax (CIT) and also collect and remit Value Added Tax (VAT). However, Binance no stick to dis requirements, so dem violate Nigerian laws and potentially face investigation and legal action for dis infraction.”
For 2023, Binance bin plead guilty to violating anti-moni laundering laws for di United States wia dem reach one plea bargain agreement wey make di company pay one big fine wey reach $4.3 billion.
