Osun State Police command don confam di arrest of Ejigbo prince as dem dey conduct investigation ova di death of Richard Idowu, wey pipo sabi as Adeori Okin for Osun State.
Police tok say di incident shele around 9:00 pm for Ejigbo, Osun state on Saturday.
Oga Idowu wey be associate professor for Prairie View A&M University for United State, die during im visit to di Ejigbo prince for di 50th coronation celebration of King Oyeyode Oyesosin Ogiyan of Ejigbodi for Osun state on Saturday.
Osun residents reportedly kill di security guard, Hammed Abdul Jelili wey fire di gun wey kill Adeori Okin as e dey try to run comot afta im gun accidentally kill di Associate professor.
Inside one press statement, di tok-tok pesin for Osun police command, Yemisi Opalola, confam say di prince order one of im security guard Hammed Abdul Jelili make im fire di double barrel gun into di air to confam if di gun dey work, na im di gun accidentally kill di victim.
Di police tok-tok pesin confam say dem don detain prince Eniola Oyeyode wey give di instruction as dem dey investigate di matta.
“Di prince Eniola Oyeyode wey give di order to im civilian guard make im fire di gun, don dey arrested and detained.
“Di State Commissioner of Police, Bzigu Dali Kwazhi, don beg members of di public especially di residents of Ejigbo make dem remain calm as investigation don begin immediately.”
Govnor Ademola Adeleke of Osun State order police make dem conduct investigation into di death of Richard Idowu.
Di governor say make security agencies prevent any possible counter-attacks of violence for di community afta di sad incident.
Oga Adeleke also deploy delegates to pay peace settlement visit to Ejigbo as im dey appeal to di family of di deceased make dem no take laws into dia hands.
Di delegate members include; commissioner of police, commissioner for chieftaincy and local goment affairs, commissioner for information and special adviser to di govnor on Security.
Adeori Okin na associate professor of statistics for department of mathematics for Prairie View A&M University in United State.
Oga Idowu graduate from University of Ilorin wit B.Sc. in Mathematics for 2003.
Im travel go United States to further im education wia im obtain Masters degree in Mathematics and Statistics from Louisiana State University for 2009.
Oga Idowu begin im career as lecturer for Louisiana Tech University for 2009 and since den e don teach undergraduates and graduates in Mathematics and Statistics courses both at Louisiana Tech University and Praire View A & M University.
In 2012, Idowu obtain im doctorate degree in Computational Analysis and Modeling from Louisiana Tech University.
E dey currently work as assistant professor of Mathematics and Statistics for Praire View A & M University, Houston Texas, im start to work wit di university for 2016.
Also, Oga Idowu na ogbonge politician for Osun state -im na member of Peoples Democratic Party afta im commot from All Progressive party in 2022.
How pulling out of Ecowas go take affect Mali, Niger, Burkina Faso