Supreme Court don confam Sim Fubara as Rivers State govnor.
Di highest for Nigeria dismiss di appeal wey Tonye Cole of di All Progressives Congress file over di 18 March 2023 governorship election.
Oga Cole challenge di election of govnor Fubara for di election wey di Independent National Electoral Commission (Inec) conduct for di state.
For di final result Fubara poll a total of 302, 614 votes to defeat im closest opponent, Tonye Cole wey score 95, 274 votes.
E allege say Fubara bin no resign im former position as Accountant General of Rivers State, and im continue to dey sign official goment documents even afta im don emerge as PDP flag bearer.
Both di tribunal and the Court of Appeal bin dismiss Tonye Cole appeal for lack of merit.
For di final judgement Justice Ibrahim Saulawa tok say Tonye Cole no fit prove im allegations of non-compliance wit di electoral act wey e bring against Sim Fubara.
Political crisis in Rivers state
Di Supreme Court judgement on di Rivers state governorship election mata dey happun as di state dey manage one political kasala.
Di fight na between govnor Fubara and im former oga Nyesom Wike, wey be di FCT minister.
Kasala bust wen tori come out say some members of di Rivers state House of Assembly wan impeach di govnor. Di majority lawmakers say di govnor no dey behave well – na so dem start di impeachment process.
Oga Fubara resistance lead to series of protests and court cases for di state. E also lead to di attack of di state assembly complex and later demolition.
E take di intervention of Nigeria president Bola Ahmed Tinubu wey initiate one ‘8-point agreement’ to resolve di mata between di govnor and di minister.
While e be like say di di two groups dey implement dia parts of di agreement, e still dey clear say di mata neva resolve.
Federal High Court for Abuja on Monday order all parties for di Rivers State Assembly crises to maintain status quo.
Di court for ruling wey Justice J. O. Abdulmalik deliver say make di parties no take any further steps, until di determination of one application wey dey seek to stop Governor Siminialayi Fubara from re-presenting di already passed 2024 budget of di State before di legislative house.
Justice Abdulmalik fix 28 February 2024 to hear di application wey some elders bring before di court.
Di court order come just afta anoda Federal High Court for Abuja bin bar govnor Siminialayi Fubara from interfering wit Rivers state assembly wey Martin Amaewhule dey lead.
Di Court also bar National Assembly from entertaining any request from di govnor to take over activities of di Rivers Assembly.
Wetin we know about di fresh kasala wey claim pipo lives for Plateau State
