Di Economic and Financial Crimes Commission (EFCC) tok say forensic investigation show say signatures wey former Central Bank govnor, Godwin Emefiele, take withdraw $6.2m from di bank dey allegedly forged.
Na Bamaiyi Haruna Mairiga, who be forensic expert on handwriting wit di EFCC, na im tok dis one as e testify for court on Thursday for di ongoing corruption trial of Emefiele for FCT High Court, Maitama, Abuja.
Mairiga wey be di Prosecution Witness 6 for di mata tok say di analysis show “differences in di pen movement impulse, terminal strokes, loop formation, angularity, etc between the disputed document and specimens provided”.
E also tok say “di author of di specimen signature marked document X no for write “signature of Muhammadu Buhari” on di disputed document.
Mairiga tok say afta im investigation, anoda independent expert bin go through im findings and agree with di outcome.
During cross examination by Emefiele lawyer, Mathew Bukaa (SAN), Mairiga admit say im no know why Emefiele dey stand trial, rather im work na to analyse di specimens given to him against di disputed document to determine weda they come from one source.
Justice HamzaMu’azu adjourn di matter to Monday, March 11, 2024 for continuation.
Remember say di Nigeria goment bin write petition give Interpol make dem place three Nigerians for red alert sake of say dem join bodi wit Emefiele to allegedly forge di signatures of former president Muhammadu Buhari and former Secretary to di Goment of di Federation, Boss Mustapha.
Goment allege say di accused pesins use di forged documents take withdraw $6.2 million from CBN vaults.
Goment put Interpol on ‘red alert’ to arrest three pipo wey forge Buhari signature to tiff billions
Di Nigeria goment bin alert Interpol make dem arrest three pipo wey allegedly forge di signature of former president Muhammadu Buhari and former Secretary to di Goment of di Federation, Boss Mustapha, to tiff $6.23 million from di Central Bank of Nigeria.
According to di letter, di three pipo na Odoh Ocheme, wey be staff of CBN, Adamu Abubakar and Imam Abubakar.
Na di Special Investigator wey President Bola Tinubu bin appoint to investigate allegation of corruption against former CBN Governor, Godwin Emefiele, na im write di letter to Interpol through di office of di Inspector General of Police.
“Investigation show say oga Odoh Eric Ocheme, (staff of di CBN) now at large, and di oda two accomplices, also now at large, bin join bodi to forge documents in di name of di President of di Federal Republic of Nigeria wey dem take tiff about US$6,230,000 in cash from di CBN,” part of di letter tok.
Di letter also tok say goment don already sama di three pipo wit six counts of criminal charges bifor di Federal High Court Abuja, but sake of say dem dey on di run, goment neva fit arraign dem bifor di court.
However, Justice Inyang Ekwo of di FHC Abuja bin issue a warrant of arrest for di three suspects for January 18, 2024.
Godwin Emefiele, former CBN oga pata-pata, dey undergo trial for di FCT High Court for Maitama, on top accuse wey FG bring on top im head.
Di allegation include obtaining by false pretence, forgery, criminal breach of trust, and conspiracy to commit felony.
Ex-SGF wash hand comot $6.2m cash Emefiele approve for foreign observers during election
Di former Secretary to di Goment of di Federation of Nigeria Boss Mustapha say im no know anytin about how di kontri former govnor of di Central Bank of Nigeria, (CBN) Godwin Emefiele approve di payment of $6,230,000 for international election observers during di 2023 general elections.
Di SGF say all di time wey im spend under President Muhammadu Buhari, e no eva come across di documents wey request for dat moni.
Dis na as one branch controller of CBN Ogau Michael bin tok on say Emefiele bin approve $6,230,000 for international election observers during di 2023 general elections.
Dis bin dey revealed during di trial of di former CBN govnor wen e appear before Justice Hamza Muazu of di High Court for Abuja on Monday 12 February.
Ogau na one of di witnesses wey di Economic and Financial Crimes Commission (EFCC) prepare to testify for di trial of Emefiele wey dey stand trial on top a 20-count charges wey dem don amend.
Di bank controller bin tell di court say na im work ontop di documents wey Emefiele bin use request for payment of of di sum of $6,230,000 in cash and na January 8 2023 dem bring di document come im office.
Di witness add say na im office assistant bin draw im attention to di document sake of say di document tok say make dem pay di moni to one staff for di office of di Secretary to di goment of di Federation (SGF).
“All requests for payments na to di branch controller and dat na my office and dat day di request to my office na $6,230,000. Na from banking services department wit signature of di Director of Banking Services wit instruction to pay di sum of $6,230,000 to a staff of di Secretary to di Goment of di Federation and e carry di name and identity card of di pesin”, im testify.
“E dey stated say di payment na for election observance and make e dey paid in cash. Di document also state say, ‘find attached di approval of di govnor of di Central Bank of Nigeria for di payment’.”
Di witness tok say di memo get di approval of di former SGF and dat of di President of Nigeria wey dey in power dat time and na wetin make am process di payment of di moni on 8 April 2023 in cash.
But wen Mustapha appear for court on Tuesday 13 February to say im own side of di allegations, e say di signature wey dey di document na attempt to fake di signature of Buhari.
Im say di federal goment no get any hand for dat kain payment to international election observers and executive decisions no be through letters.
“All through my service year as di SGF, I neva come across dis documents wey dem claim say na Buhari sign am. From wetin I dey look for face as I serve for five years and seven months as SGF, dis document no come from di president.”
“Any letter correspondence wey carry di seal of di Nigerian president no dey carry reference number becos say di seal na di authority,” Mustapha tok.
Di charges against Emefiele according to EFCC border on ‘forgery, corrupt advantages, conspiracy and criminal breach of trust, and obtaining by false pretences’.
Emefiele palava start wit President Bola Tinubu suspending am as di CBN govnor for June 9, 2023. Afta dat, di Department of State Services (DSS) confam say e dey dia custody.
Di next sittings na March 11, and 25 for continuation of trial.
Bandits kidnap more dan 100 school children for Kaduna, tori of security breach for Nigeria
