Di former Govnor of Ondo state Rotimi Akeredolu, SAN, CON, dey make im final journey to di world beyond as family and friends gada to attend im funeral service on Friday.
Di final funeral service take place for di late govnor hometown for Owo wia dignitaries gada for St. Andrews Cathedral.
Di mood for di church na wetin we fit describe as sober wia pipo reflect and pour emotions from di heart.
Wen di deadi bodi of late Akeredolu bin enta di church, na everibodi stand-up as dem day carry am go di front of di altar.
Plenti govnors dey in attendance to witness how dia former counterpart dey go im final resting place.
Na Ondo state Govnor Lucky Aiyedatiwa bin lead oda govnors.
Odas wey dey present include Govnor Seyi Makinde of Oyo state; Govnor Godwin Obaseki of Edo state and Govnor Babajide Sanwo-Olu of Lagos state.
Di National Chairman of di APC, Abdullahi Ganduje and Nigeria Vice President Kashim Shettima also dey in attendance for di funeral service.
Former govnors wey attend di funeral service include Kayode Fayemi of Ekiti state, Senator Gbenga Daniel of Ogun state, Olusegun Mimiko of Ondo state amongst odas.
Odas include minister of Marine and Blue economy Adegboyega Oyetola.
Akeredolu na di former chairman of di southwest govnors forum wen im dey alive. Im be one of di strong voice wey dey behind di creation of di Amotekun security network wey dey combat insecurity for di region and e no dey surprising say dem put di Amotekun full uniform ontop im casket.
On Wednesday wey dem carry bodi of late Akeredolu enta Owo, na wit drums, shouts and tears dem use receive di bodi.
Dem conduct one of di traditional procession ‘Ajabue’ for am and major streets for Owo dey locked down sake of plenti pipo wey wan see di bodi of di late Akeredolu as dem dey carry am.
Same Wednesday , dem hold court session for di late govnor before dem come do di lying-in-state and commendation service for di Akure township stadium.
‘Aketi’ as many dey call am, na very courageous man, according to many.
During di lying-in-state, plenti dignitaries bin dey in attendance and di pipo for di state also come out in numbers to come see di govnor for di last time before dem go bury am.
BDC operators, market react to EFCC clampdown as goment continue to try save di naira
